د زمري تر ۲۴مې څلور ورځې پاتې دي؛ هغه ورځ چې د افغانستان د تېر مسیر او هغو ارزښتونو ته د بیا کتنې فرصت برابروي چې د دې هېواد هویت یې جوړ کړی دی.
په تېرو دوو لسیزو کې، په افغانستان کې د لوېدیځو هېوادونو د سیاسي او پوځي حضور ترڅنګ، لوېدیځ کلتور او د ژوند طرز هم په پراخه کچه خپور شو. رسنۍ، ټولنیزې شبکې، فلمونه، موسیقي، ژبه او نوي فرهنګي الګوګانې، په ځانګړې توګه د ځوان نسل په ژوند کې په زیاتېدونکي ډول ځای پر ځای شوې.
په هغه وخت کې یوه مهمه پوښتنه دا وه چې د دومره بهرنیو اغېزو په منځ کې به اسلامي او افغاني فرهنګ او هویت څنګه خوندي پاتې شي؟ نن هم دا پوښتنه خپل اهمیت لري؛ ځکه د فرهنګي هویت ساتل له نړۍ څخه د بېلتون په معنا نه دي، بلکې د خپلو ریښو پېژندل او د هغو ارزښتونو په اړه هوښیارانه انتخاب کول دي چې زموږ له فرهنګ او عقایدو سره سمون ولري.
افغانستان نن هڅه کوي چې پر دیني ارزښتونو، ملي فرهنګ او خپلو دودونو لا ډېر ټینګار وکړي او په ورته وخت کې له نړۍ سره خپلې اړیکې هم وساتي.
۲۴مه د زمري دا فرصت راکوي چې ووایو: د سیاسي او اقتصادي خپلواکۍ ترڅنګ، د فرهنګي هویت ساتنه هم د یوه ملت د خپلواکۍ یوه برخه ده.
#دزمري۲۴مه
خپلواکي مو مبارک شه!