شهید حاجي ملا عبدالرحمن (حاجي نېکه) – تقبلهالله
دریمه برخه
پوځي تاکتیکونه او د جګړې په ډګر کې بریاوې
د بکوا ولسوالۍ هغه سیمه وه چې د اشغال په لومړیو کلونو کې د بهرنیو ځواکونو لپاره په یوي سختي او له وېرې ډکه سیمه بدله شوې وه. حاجي نیکه او د هغه ملګرو په دې سیمه کې د پام وړ بریاوې ترلاسه کړې. بکوا په داسې سیمه بدله شوه چې د بهرنیو ځواکونو لپاره پکې د پراخو عملیاتو ترسره کول له جدي ستونزو سره مخ وو.
په دې ولسوالۍ کې ګڼ شمېر مجاهدین پوځي زده کړې او روزنه ترلاسه کوله او هره ورځ د مبارزینو شمېر زیاتېده. د حاجي نیکه ځانګړي پوځي تاکتیکونه، په ځانګړې توګه د لږ لګښت په وسیله د لاسي بمونو جوړول او کارول، د فراه په مجاهدینو کې په پراخه کچه پېژندل شوي وو. هغه د لږو امکاناتو په لرلو سره د نوښت او ابتکار له لارې داسې ساده وسایل برابرول چې د جګړې په ډګر کې یې د مقابل لوري پر وړاندې اغېز لرلو.
الله تعالی په قرآن کریم کې فرمایي:
«وَأَعِدُّوا لَهُمْ مَا اسْتَطَعْتُمْ مِنْ قُوَّةٍ»
ژباړه: «او د هغوی د مقابلې لپاره تر خپلې وسې پورې هر ډول ځواک چمتو کړئ.»
(الأنفال: ۶۰)
حاجي نیکه هم د خپلو محدودو امکاناتو په کارولو سره هڅه کوله چې په سختو شرایطو کې د مقابلې وړتیا لوړه کړي.
لوړ مورال، په سختو جګړو کې فعاله ونډه او له خپلو ملګرو سره په سنګرونو کې اوږه په اوږه درېدل د حاجي نیکه له څرګندو ځانګړنو څخه وو. هغه د بهرنیو ځواکونو پر وړاندې له مبارزې لاس وانخیست او په خپلو هڅو کې یې له ځنډ او شاتګ څخه ډډه کوله.
د فراه ولایت په هره لویشت ځمکه کې د جګړې او مقاومت بېلابېلې خاطرې پاتې دي؛ داسې خاطرې چې نن هم د دې سیمې د خلکو، له مشرانو نیولې تر ځوانانو پورې، په خبرو کې یادېږي.
د فراه د شهیدانو مېړانه، قرباني او فداکاري د دې خاورې په تاریخ کې د روښانه یادونو په توګه پاتې دي؛ هغه یادونه چې د خلکو په حافظه کې یې د خپلواکۍ، مېړانې او سرښندنې کیسې ژوندۍ ساتلې دي.
د مطلب دوام هره دوشنبه او چهارشنبه د سهار پر ۱۰ بجو زموږ د ټولنیزو پاڼو څخه تعقیب کړئ!