شهید ملا محمد صادق (احسان الله) – تقبله الله
اوومه برخه
تلپاتې میراث؛ د نسلونو لپاره بېلګه
شهید ملا محمد صادق احسانالله د افغانستان د غیرت، مېړانې او زړورتیا یوه څرګنده بېلګه ده. د هغه ژوند د صبر، جهاد او قربانۍ کیسه ده. هغه په تش لاسونو او ټینګې ارادې سره د نړۍ د تر ټولو پرمختللي جنګي ماشین پر وړاندې ودرېد. هغه موږ ته وښوده چې د سختو شرایطو په زړه کې هم د الله تعالی پر توکل او ایمان تکیه کولی شو، خپله لار پیدا او د خپل هدف پر لور ګام واخلو. هغه ثابته کړه چې زندانونه او شکنجې هېڅکله د الله د لارې د مجاهدینو هوډ نه شي کمزوری کولی. هغه وښوده چې د عقیدې په لار کې مرګ پای نه، بلکې د تلپاتې ژوند پیل دی.
نن د شهید ملا محمد صادق احسانالله نوم او یاد د فراه ولایت او ټول افغانستان د خلکو په زړونو کې ژوندی دی. د هغه د مدبرانه رهبرۍ، متواضع اخلاقو او ویاړلې شهادت خاطرې د افغانستان د ځوان نسل لپاره د لارې د څراغ په څېر ځلېږي. دا روایت د هغو خلکو د قربانۍ، زړورتیا او استقامت سند دی چې په عزت او غیرت یې له خپلې خاورې او دین څخه دفاع کړې ده.
هیله ده راتلونکي نسلونه پوه شي چې څنګه افغانستان، د اتلانو او مبارزینو دغه خاوره، د امپراتوریو پر هدیره بدله شوې ده؛ هغه خاوره چې د خپلو بچیانو په ایمان، مقاومت او پاکو وینو یې د پردیو هر یرغل له ماتې او نابودۍ سره مخ کړی دی.
هیله ده د دې خاورې بچیان تل شهیدان خپل ریښتیني اتلان وبولي او د هغوی له مکتبه دیني او ملي غیرت زده کړي، ترڅو دا سپېڅلې لار هېڅکله د الله له لارې د نارینهوو او مبارزینو له شتون څخه تشه نه شي او د جهاد کاروان د الهي عدالت تر ظهور او د ځمکې له مخ څخه د ظلم تر له منځه تلو پورې دوام ومومي.
آمین یا رب العالمین.