شهید شیخالاسلام رحیم الله حقاني
لومړۍ برخه:
افغانستان یو داسې هېواد دی چې زړور او مېړني انسانان پکې روزل شوي دي، او د تاریخ په اوږدو کې تل د ظلم او اشغال پر وړاندې د مبارزې او مقاومت له امله د یو ځلېدونکي ګاڼې په څېر پېژندل شوی دی. دا ویاړ په اسانۍ نه دی ترلاسه شوی، بلکې د هغو نارینهوو د ایمان او غیرت پایله ده چې هېڅکله یې د ذلت بار نه دی منلی. د انګلیسي استعمار یرغل، د پخواني شوروي اتحاد د پوځ خونړی تجاوز، او وروسته د متحده ایالاتو او د هغي د متحدینو شل کلن اشغال، ټول د دې ملت د ټینګې ارادې او زړورتیا څرګند ثبوتونه دي چې هېڅکله یې د ظلم پر وړاندې سر نه دی ټیټ کړی.
په دې ټولو سختو پړاوونو کې، د مقاومت اصلي محور رباني علما وو؛ هغه کسان چې د علم په رڼا او د جهاد په توره یې د ظلم تیارې ماتې کړې. الله تعالی فرمایي: «يَا أَيُّهَا الَّذِينَ آمَنُوا إِنْ تَنْصُرُوا اللَّهَ يَنْصُرْكُمْ وَيُثَبِّتْ أَقْدَامَكُمْ» (محمد: ۷)؛ اې مؤمنانو! که تاسو د الله مرسته وکړئ، الله به ستاسو مرسته وکړي او ستاسو قدمونه به ټینګ کړي. دا الهي وعده تل د دې خاورې د مجاهدینو لپاره د لارې څراغ پاتې شوې ده.
د اوږدو کلونو په ترڅ کې، ګڼ شمېر رباني علماوو او درنو شیوخو د ظلم د سترو قدرتونو پر وړاندې د مبارزې بیرغ اوچت ساتلی دی. هر یو یې د جهاد په ستورو ډک اسمان کې یو ځلیدونکی ستوری و، خو ځینې تر نورو ډېر ځلېدلي دي؛ ځکه هغوی نه یوازې د جګړې په ډګر کې، بلکې د فکر او فکري لارښوونې په ډګر کې هم بېساری رول ادا کړی دی.
له دغو پاتې کېدونکو سمبولونو څخه یو هغه شهید دی چې نوم یې د شهادت له مینې او د کفر پر وړاندې له کرکې سره تړلی دی: شهید شیخالاسلام رحیم الله حقاني؛ د منبر بلبل، د بیتالمقدس مدافع، د حق غږ او د عدالت ژبه. هغه څوک و؟ او څنګه یې ژوند وکړ چې نوم یې د تاریخ د تلپاتې څېرو په کتار کې شامل شو؟
د مطلب دوام هره دوشنبې او چهارشنبې د سهار پر ۱۰ بجو زموږ د ټولنیزو پاڼو څخه تعقیب کړئ!