لیکوال: نهضت
درېیم فصل: د لوېدیځ د ژوند د سبک پایلې
ټولنیزې پایلې
أ. د کورنۍ د بنسټ له منځه تلل (طلاق، نامشروع اولادونه) دوام:
د کورنۍ ټولنپوهان کورنۍ د ټولنې لومړنی او تر ټولو مهم بنسټ ګڼي، چې د ټولنې د الګو جوړونې او د شخصیت په روزنه کې اساسي رول لري. د اسلام له نظره هم کورنۍ یوازې یو ټولنیز بنسټ نه دی، بلکې د بشپړو، روزل شویو او مسؤلو انسانانو د روزنې زانګو بلل کېږي. ځینې کسان ان کورنۍ د ښار ریښه او ښار د هېواد ریښه ګڼي، چې دا خبره د تمدنونو د بنسټ په توګه د کورنۍ رول څرګندوي.
خو په معاصره دوره کې کورنۍ د مدرنیزم او پوسټمدرنیزم د ارزښتونو تر اغېز لاندې له بېلابېلو بڼو سره مخ شوې ده؛ لکه بېاولاده کورنۍ، د یوه مور یا یوه پلار تر سرپرستۍ لاندې کورنۍ، همجنسپالې کورنۍ او ان هغه بڼې چې د انسان او حیوان ترمنځ اړیکې د کورنۍ په نوم مطرح کوي او ملاتړ یې کېږي. حال دا چې د دغو بڼو شتون په خپله د هغو د سمون او ارزښتمنتیا معنا نه لري.
دا پدیدهګانې په حقیقت کې د لوېدیځ د لیبرالیزم، سیکولریزم او د انسان د بېقیده خوند اخیستنې د فکرونو پایلې ګڼل کېږي. که څه هم ځینې د سیکولر او الحادي کلتور مینهوال د دغو چلندونو د توجیه هڅه کوي، خو په لوېدیځ کې ډېر پوهان هم دغه وضعیت د لوېدیځ تمدن د بقا لپاره لوی ګواښ بولي. د بېلګې په توګه، فرانسیس فوکویاما، ساموېل هنټینګټن او برژینسکي په لوېدیځ کې د ټولنیز پیوستون د کمزورتیا او د کورنۍ د بنسټ د زوال په اړه د خطر زنګ وهلی دی (شریفي، ۱۳۹۱: ۲۳۴).
د پرمختګ وهم (د لوېدیځ ژوند پر سبک کره کتنه)
